Login

Lost your password?
Don't have an account? Sign Up

Dinakaran Tamilnadu Tamil News

  • கொடநாடு பங்களா கணினி ஆபரேட்டர் தினேஷ் மரணம் தொடர்பாக அவரது தந்தை போஜனிடம் உதகை டி.எஸ்.பி. விசாரணை
    on September 21, 2021 at 8:22 am

    உதகை: கொடநாடு பங்களா கணினி ஆபரேட்டர் தினேஷ் மரணம் தொடர்பாக அவரது தந்தை போஜனிடம் தனிப்படியை சேர்ந்த உதகை டி.எஸ்.பி. விசாரணையை தொடங்கியுள்ளார். 2017 கொடநாடு கொலை, கொள்ளை நடந்த 2 மாதத்தில் கோத்தகிரி வீட்டில் தினேஷ்குமார் தூக்கிட்டு தற்கொலை செய்துகொண்டார். தினேஷ்குமார் தற்கொலைக்கு காரணம் என்ன என்பது பற்றி சுமார் 2 மணி நேரம் விசாரணை நடந்துள்ளது.

  • தேர்தல் மன்னன் பத்மராஜன் 225வது முறையாக போட்டி
    on September 21, 2021 at 1:19 am

    சின்னசேலம்: சேலம் மாவட்டம் மேட்டூர் பகுதியை சேர்ந்தவர் பத்மராஜன். இவர் 1988 முதல் உள்ளாட்சி தேர்தல், எம்எல்ஏ, எம்பி, குடியரசுதலைவர் உள்ளிட்ட பல்வேறு பதவிகளுக்கு வேட்புமனு தாக்கல் செய்துள்ளார். இதுவரை இவர் 221 தடவை பல்வேறு பதவிகளுக்கு வேட்புமனு தாக்கல் செய்துள்ளார். கின்னஸ் மற்றும் லிம்கா புத்தகங்களில் இடம்பிடித்துள்ளார். இந்நிலையில் சின்னசேலம் ஊராட்சி ஒன்றிய அலுவலகத்திற்கு நேற்று பத்மராஜன் வந்து, ஒன்றியத்திற்கு உட்பட்ட வி.அலம்பளம் ஊராட்சி தலைவர் பதவிக்கும், அம்மையகரம் வார்டு உறுப்பினர் பதவிக்கும் மனுதாக்கல் செய்தார். அதைப்போல சின்னசேலம் ஒன்றியத்திற்கு உட்பட்ட 11வது வார்டு ஒன்றிய கவுன்சிலர் பதவிக்கும், 11வது வார்டு மாவட்ட கவுன்சிலர் பதவிக்கும் வேட்பு மனுதாக்கல் செய்தார். இதையும் சேர்த்து அவர் 225வது முறையாக தேர்தலில் வேட்புமனு தாக்கல் செய்துள்ளார்.

  • 15 வயது சிறுமிக்கு பாலியல் துன்புறுத்தல் போக்சோ வழக்கு ரத்து கோரி அதிமுக மாஜி எம்எல்ஏ மனு
    on September 21, 2021 at 1:19 am

    மதுரை: கன்னியாகுமரி மாவட்டம், நாகர்கோவிலைச் சேர்ந்தவர் அதிமுக மாஜி எம்எல்ஏ நாஞ்சில் முருகேசன். அப்பகுதியை சேர்ந்த 15 வயது சிறுமி, நாஞ்சில் முருகேசன் உள்ளிட்ட பலர், கடந்த 2017 முதல் தன்னிடம் பாலியல் துன்புறுத்தலில் ஈடுபட்டதாக கூறியதையடுத்து போக்சோ உள்ளிட்ட 6 பிரிவுகளில் வழக்குப்பதிந்து நாஞ்சில் முருகேசனை போலீசார் கைது செய்தனர். இந்நிலையில் தனக்கு எதிரான போக்சோ வழக்கை ரத்து செய்யக் கோரி நாஞ்சில் முருகேசன், ஐகோர்ட் மதுரை கிளையில் மனு செய்தார். அதில், ‘‘சம்பவம் நடந்ததாக கூறப்படும் நேரத்தில் யாரும் புகார் அளிக்கவில்லை. வேண்டுமென்றே அரசியல் காரணங்களுக்காக புகார் அளிக்கப்பட்டது. இதன் அடிப்படையில் போலீசார் கடந்தாண்டு வழக்கு பதிந்துள்ளனர். இந்த வழக்கின் விசாரணை நாகர்கோவில் போக்சோ சிறப்பு நீதிமன்றத்தில் நடந்து வருகிறது. இந்த வழக்கின் விசாரணைக்கு தடை விதிக்க வேண்டும். என் மீதான போக்சோ வழக்கை ரத்து செய்ய வேண்டும்’’ என்று கூறியிருந்தார். இந்த மனுவை நேற்று விசாரித்த நீதிபதி ஜி.இளங்கோவன், நாகர்கோவில் அனைத்து மகளிர் காவல்நிலைய இன்ஸ்பெக்டர் பதில் மனு தாக்கல் செய்ய உத்தரவிட்டு விசாரணையை அக். 28க்கு தள்ளி வைத்தார்.

  • திருமணம் செய்து 2 பிள்ளைகளுடன் தவிக்க விட்டு அதிமுக முன்னாள் அமைச்சரின் உதவியாளர் 5 ஆண்டாக மாயம்: கடத்தப்பட்டதாக கூறி கலெக்டரிடம் மனைவி மனு
    on September 21, 2021 at 1:18 am

    விருதுநகர்: மதுரை ஆனையூரை சேர்ந்த ரெஜினா தனது பிள்ளைகள் இருவருடன், விருதுநகர் கலெக்டர் அலுவலகம் வந்து நேற்று மனு அளித்தார். பின் நிருபர்களிடம் கூறியதாவது: அதிமுக முன்னாள் அமைச்சர் வைகை செல்வனின் உதவியாளராக இருந்தவர் ரவி (எ) இளையவன் ரவி. வேலை வாங்கி தருவதாக ஆசை வார்த்தை கூறி என்னை திருமணம் செய்தார். தற்போது 6, நான்கரை வயதில் மகன்கள் உள்ளனர். முன்னாள் அமைச்சர் வைகை செல்வனின் தொடர்பில் இருந்த கோகிலாதேவி என்பவர், கணவர் ரவியை கடத்தி கடந்த 5 வருடங்களாக மறைத்து வைத்துள்ளார். தற்போது பலர் வீடு தேடி வந்து மிரட்டி, ரவிக்கும் எனக்கும் விவாகரத்து செய்ய கையெழுத்து கேட்டு என்னை மிரட்டுகின்றனர். என் கணவர் ரவியை மீட்டு தர வேண்டும். அதிமுக ஆட்சியில் கடந்த 5 வருடங்களாக காவல் நிலையத்தில் புகார் அளித்தும் நடவடிக்கை இல்லை. தற்போது கோகிலாதேவி, ரவியை இரண்டாவது திருமணம் செய்து மறைத்து வைத்திருப்பதாகவும் தகவல் வருகிறது. எனது கணவரை கலெக்டர், எஸ்பி ஆகியோர் மீட்டுத்தர வேண்டும். இவ்வாறு அவர் தெரிவித்தார்.

  • வேரோடு பெயர்த்தெடுக்கப்பட்டது மதுரை கலைஞர் நூலக கட்டிடம் அமையுமிடத்தில் மரங்கள் இடமாற்றம்: மறுநடவு செய்து 90 நாள் வளர்ச்சி கண்காணிக்க முடிவு
    on September 21, 2021 at 1:17 am

    மதுரை: மதுரையில் 2 லட்சம் சதுர அடி பரப்பில், ரூ.70 கோடி செலவில் ‘‘கலைஞர் நினைவு நூலகம்’’ அமைக்கப்பட உள்ளது. மதுரை - நத்தம் ரோட்டில் பொதுப்பணித்துறை குடியிருப்பு பகுதியில்  நூலகக் கட்டிடம் அமையும் இடத்தில் 15 மரங்கள் உள்ளன. இந்த மரங்களை பொதுப்பணித்துறையினர் மேற்பார்வையில் அப்படியே வேருடன் பெயர்த்தெடுத்து, அருகிலேயே காலியிடங்களில் மறுபடியும் நடும் பணி நடந்து வருகிறது. இதுகுறித்து மரங்களுக்கான மறுவாழ்வு அமைப்பின் திட்ட அலுவலர் ஓசை செய்யது கூறியதாவது: மதுரையில் கலைஞர் நூலகத்திற்கான கட்டிடம் அமையும் இடத்தில் வேம்பு, புங்கை, வெப்பாலை, வில்வம் உள்ளிட்ட 15 பழமையான மரங்கள் உள்ளன. இவற்றை இயற்கையான முறையில் மறுநடவு செய்யும் பணியை துவக்கியுள்ளோம். மரத்தை சுற்றி குழி எடுத்து, கிளைகளை லேசாக வெட்டி, சாணி தடவி, சணல் சாக்கு வைத்து கட்டி பாதுகாத்தோம். மரங்களைச் சுற்றிய பக்க வேர்களை தவிர்த்து, ஆணிவேர் அப்படியே இருக்கும் வகையில் பாதுகாத்து, அப்பகுதியில் இயற்கை உரங்கள் இடப்பட்டன. தற்போது இங்கு புதிய வேர்கள் கிளம்பியுள்ளன. 2 நாட்களுக்கு முன்பு அருகிலேயே குழி எடுத்து ஆற விடப்பட்டது. தாய் மண்ணுடன் பெயர்த்தெடுக்கப்பட்ட மரங்கள் அப்படியே அருகில் மாற்று இடத்தில் குழி எடுத்திருந்த இடங்களில் பொக்லைன் மற்றும் கிரேன் உதவியுடன் மறுநடவு செய்யப்பட்டு வருகிறது. 90 நாட்களுக்கு மரங்களின் வளர்ச்சி கண்காணிக்கப்படும். இவ்வாறு அவர் தெரிவித்தார்.

  • திருவண்ணாமலையில் 19வது மாதமாக கிரிவலத்துக்கு தடை
    on September 21, 2021 at 1:17 am

    திருவண்ணாமலை: திருவண்ணாமலை அண்ணாமலையார் கோயிலில் இதுவரை கிரிவலத்துக்கு தடை நீங்கவில்லை. தொடர்ந்து 19வது மாதமாக, இம்மாதமும் பவுர்ணமி கிரிவலத்துக்கு தடை விதிக்கப்பட்டது. புரட்டாசி மாத பவுர்ணமி கிரிவலம் செல்ல உகந்த நேரம் நேற்று அதிகாலை 5.20 மணிக்கு தொடங்கி, இன்று அதிகாலை 5.51 மணிக்கு நிறைவடைகிறது. நேற்று கிரிவல பாதை வழியாக செல்ல முயன்றவர்களை போலீசார் தடுத்து நிறுத்தி திருப்பி அனுப்பினர்.  எப்போதும், பவுர்ணமி நாளில் பக்தர்கள் வெள்ளத்தில் நிரம்பியிருக்கும் கிரிவலப்பாதை நேற்று வெறிச்சோடி காணப்பட்டது. அதேசமயம் பக்தர்கள் கோயில் ராஜகோபுரம் எதிரே தேரடி வீதியில் கற்பூரம் ஏற்றி வழிபட்டனர்.

  • கொடநாடு விவகாரத்தில் புதிய திருப்பம் கம்ப்யூட்டர் ஆபரேட்டர் தற்கொலை வழக்கை மீண்டும் விசாரிக்க முடிவு: கோத்தகிரி தாசில்தாரிடம் தனிப்படை மனு
    on September 21, 2021 at 1:16 am

    ஊட்டி: கொடநாடு கொலை வழக்கு விசாரணையில் புதிய திருப்பமாக, கம்ப்யூட்டர் ஆபரேட்டர் தற்கொலை வழக்கை மீண்டும் விசாரிக்க கோத்தகிரி தாசில்தாரிடம் தனிப்படை போலீசார் மனு அளித்துள்ளனர். கொடநாடு எஸ்டேட்டில் கடந்த 2017ம் ஆண்டு ஏப்ரல் 23ம் தேதி கொலை, கொள்ளை சம்பவம் நடந்தது. இங்கு முக்கிய ஆவணங்கள் கொள்ளையடிக்கப்பட்டிருக்கலாம் என்று கூறப்படுகிறது. இந்த சம்பவத்தில் ஜெயலலிதாவின் கார் டிரைவர் கனகராஜ், கோவையை சேர்ந்த சயான், வாளையார் மனோஜ் உள்பட 11 பேர் ஈடுபட்டது தெரியவந்தது. இதில் கனகராஜ் ஆத்தூரில் நடந்த விபத்தில் இறந்தார். சயான் உட்பட 10 பேரை கோத்தகிரி சோலூர்மட்டம் போலீசார் கைது செய்து சிறையில் அடைத்தனர். இவ்வழக்கு விசாரணை கடந்த 3 ஆண்டுகளுக்கு மேலாக ஊட்டியில் உள்ள மாவட்ட நீதிமன்றத்தில் நடந்தது வருகிறது. இவ்வழக்கில் முக்கிய குற்றவாளி சயான் கடந்த மாதம் 17ம் தேதி போலீசாரிடம் புதிய வாக்குமூலம் அளித்தார். இதைதொடர்ந்து, சாலை விபத்தில் மர்மமாக இறந்த ஜெயலலிதாவின் முன்னாள் கார் டிரைவர் கனகராஜின் அண்ணன் தனபால், மனைவி, மைத்துனர், அவரது நண்பர்கள் என பலரிடமும் தனிப்படை போலீசார் விசாரணை மேற்கொண்டனர். குற்றவாளி ஜம்சீல் அலியிடமும் விசாரணை நடத்தப்பட்டது. இந்நிலையில், கொடநாடு எஸ்டேட்டில் கடந்த 2017ல் பணியாற்றிய கம்ப்யூட்டர் ஆபரேட்டர் தினேஷ்குமார் என்பவர் அதே ஆண்டு ஜூலை 3ம் தேதி தற்கொலை செய்துகொண்டார். கொடநாடு கொலை வழக்கு விசாரணை நடந்துகொண்டிருந்தபோதே இவர் தற்கொலை செய்துகொண்டது பெரும் பரபரப்பை ஏற்படுத்தியது. தினேஷ்குமார் சடலம் தூக்கில் தொங்கிய லுங்கி அவருடையது அல்ல என்று குடும்பத்தினர் கூறியதாக தகவல் வெளியானது. எனினும் இவ்வழக்கை தற்கொலை வழக்காகவே சோலூர்மட்டம் போலீசார் பதிவு செய்திருந்தனர். இப்போது கொடநாடு வழக்கு விசாரணை மீண்டும் துவங்கியுள்ள நிலையில் தினேஷ்குமார் தற்கொலை குறித்து மீண்டும் போலீசார் விசாரணை மேற்கொள்ள திட்டமிட்டுள்ளனர். தற்கொலை வழக்கை மீண்டும் விசாரிக்க வேண்டுமானால்  வருவாய்த்துறை அதிகாரிகளிடம் அனுமதி பெற வேண்டும் எனக் கூறப்படுகிறது.  எனவே தனிப்படை போலீசார் தினேஷ் தற்கொலை வழக்கை மீண்டும் விசாரிக்க அனுமதி கோரி கோத்தகிரி தாசில்தாரிடம் மனு அளித்துள்ளனர். இதன் அடிப்படையில் இன்னும் ஓரிரு நாட்களில் தினேஷ் பெற்றோர், உறவினர்கள் மற்றும் எஸ்டேட் நிர்வாகிகளிடம் இது தொடர்பாக விசாரணை மேற்கொள்ளப்படும் என எதிர்பார்க்கப்படுகிறது. தொடர்ந்து திருப்பங்களை ஏற்படுத்தி வரும் கொடநாடு கொலை வழக்கில், தினேஷ்குமார் மரணம் பற்றிய விசாரணையும் புதிய திருப்பத்தை ஏற்படுத்தும் என எதிர்பார்க்கப்படுகிறது.

  • என்னிடம் இருக்கும் ரோல்ஸ் ராய்ஸ் காரின் மதிப்பு ரூ.5 லட்சம்: கே.சி.வீரமணி தகவல்
    on September 21, 2021 at 1:15 am

    ஜோலார்பேட்டை: லஞ்ச ஒழிப்பு போலீசார் நடத்திய சோதனை தொடர்பாக திருப்பத்தூரில் நேற்று முன்னாள் அமைச்சர் கே.சி.வீரமணி அளித்த பேட்டி: எனது குடும்பத்தினர் பரம்பரையாக பணக்காரர்கள். இது எல்லோருக்கும் தெரியும். பினாமியின் பெயர்களில் நான் சொத்து சேர்க்க வேண்டிய அவசியம் இல்லை. பிள்ளைகளுக்கு வீடு கட்ட மணல் சேமித்து வைத்துள்ளேன். எனக்கு ரூ.40 கோடி வங்கிக் கடன் உள்ளது. நான் தங்க நகைகள் அணிய மாட்டேன். ஏனென்றால் நான் ஆடம்பரத்தை விரும்பவில்லை. ஆனால் சொகுசு கார்களில்தான் செல்வேன். எனக்கு சிறு வயதில் இருந்தே சொகுசு கார்கள் பிடிக்கும். நான் 7ம் வகுப்பு படிக்கும்போதே எனது தந்தை எனக்கு பென்ஸ் கார் வாங்கி கொடுத்தார். என்னிடம் இருக்கும் ரோல்ஸ் ராய்ஸ் கார் 40 ஆண்டுகள் பழமையானது. அதன் மதிப்பு ரூ.5 லட்சம் தான் என்றார்.

  • பெட்ரோல், டீசல் விலையில் செஸ் வரியை ஒன்றிய அரசு கைவிட்டால் ஜிஎஸ்டிக்குள் வரத்தயார்: பிடிஆர்.பழனிவேல் தியாகராஜன் பேட்டி
    on September 21, 2021 at 1:15 am

    மதுரை:  தமிழக  நிதியமைச்சர் பிடிஆர்.பழனிவேல்  தியாகராஜன் நேற்று மதுரையில் அளித்த பேட்டி: பெட்ரோல், டீசல் விலையை ஜிஎஸ்டி வரம்புக்குள் கொண்டு வரவேண்டுமென முதல்வர் மு.க.ஸ்டாலின் கடந்த 2018ல் கோரிக்கை விடுத்தார். 2018க்கும், 2021க்கும் இடைப்பட்ட காலங்களில் பெட்ரொல், டீசல், கச்சா எண்ணெய் விலையில் பல்வேறு மாற்றங்கள் நிகழ்ந்துள்ளன. 2014ல் பாஜ ஆட்சி பொறுப்பேற்றபோது செஸ் வரி பெட்ரோலுக்கு 10 ரூபாயாகவும், டீசலுக்கு 5 ரூபாயாகவும் இருந்தது. தற்போது பெட்ரோல் வரி 32 ரூபாயாகவும், டீசல் வரி 31 ரூபாயாகவும் உள்ளது. மாநிலங்களில் இருந்து எடுக்கப்பட்ட செஸ் வரியை ஒன்றிய அரசு மாநிலங்களுக்கு பிரித்துக் கொடுக்காமல் வைத்துள்ளது. ஒன்றிய அரசின் மொத்த வருமானத்தில் 20 சதவீதம் பெட்ரோல், டீசல் வழியாக வருகிறது. பெட்ரோல், டீசல் விலையை ஜிஎஸ்டி வரம்புக்குள் கொண்டு வர ஒன்றிய அரசும் விரும்பவில்லை. மாநில அரசுகளும் விரும்பவில்லை. பன்னாட்டு நிறுவனங்களுக்கு வரிகளை ஒன்றிய அரசு குறைத்துள்ளதால் மக்கள் மீது இருமடங்கு வரி உயர்த்தப்பட்டுள்ளது. மாநிலங்களுக்கு பெட்ரோல், டீசல், ஆல்கஹால் ஆகிய இரு வரி வருவாய் மட்டுமே கிடைக்கிறது. மாநில வரி வருவாயையும் ஒன்றிய அரசு எடுத்துக்கொண்டால் மாநிலங்கள் எப்படி நிர்வாகத்தை நடத்த முடியும்? நிலைமைக்கு ஏற்ப வரியில் மாறுதல் செய்யும் உரிமையை மாநில அரசு இழந்து விட்டது. எனவே, நிலைமை மாறியுள்ளதால் அரசின் நிலைப்பாடு மாறி உள்ளது. ஆனால் கொள்கை மாறவில்லை. பெட்ரோல், டீசல் விலையில் ஒன்றிய அரசு விதிக்கும் செஸ் வரியை கைவிட்டால், தமிழக அரசு ஜிஎஸ்டிக்குள் வர தயாராக உள்ளது. இவ்வாறு அவர் தெரிவித்தார்.

  • சிவகாசி அருகே பட்டாசு ஆலை விபத்தில் தொழிலாளி கருகி பலி
    on September 21, 2021 at 1:14 am

    சிவகாசி: சிவகாசி அருகே பட்டாசு ஆலை வெடி விபத்தில் தொழிலாளி உடல் கருகி உயிரிழந்தார். விருதுநகர் மாவட்டம், சிவகாசி - வெம்பக்கோட்டை சாலையில், சரஸ்வதிபாளையத்தில் கோடீஸ்வரன் (58) என்பவருக்கு சொந்தமான கேப் வெடிகள் தயாரிக்கும் பட்டாசு ஆலை இயங்கி வருகிறது. இங்கு பொட்டு வெடி, ரோல்கேப் போன்றவை தயாரிக்கப்படுகின்றன. தயாரான ரோல்கேப் வெடிகளில் காகிதங்களை  கத்தரித்து வெட்டி எடுக்கும் பணியில் நேற்று தொழிலாளர்கள் ஈடுபட்டிருந்தனர். அப்போது உராய்வு ஏற்பட்டு ஒரு அறையில் வெடி விபத்து ஏற்பட்டது. இதில் கேப் வெடிகள் பலத்த சத்தத்துடன் வெடித்துச் சிதறி, அறையின் மேற்கூரை சேதமடைந்தது. அங்கு பணியில் இருந்த சின்னபொட்டல்பட்டியை சேர்ந்த சின்னமுனியப்பன் (60) உடல் கருகி பலியானார். இது குறித்து சிவகாசி டவுன் போலீசார் வழக்குப்பதிந்து விசாரிக்கின்றனர்.

  • புள்ளிங்கோ ஸ்டைலில் பள்ளி வந்த 100 மாணவர்களுக்கு தலைமுடி திருத்தம்: தலைமையாசிரியர் ஏற்பாடு
    on September 21, 2021 at 1:13 am

    வேலூர்: வேலூரில் அரசு உதவி பெறும் மேல்நிலைப்பள்ளியில் புள்ளிங்கோ ஸ்டைலில் வந்த 100 மாணவர்களுக்கு தலைமை ஆசிரியர் சொந்த செலவில் தலைமுடி திருத்தம் செய்தார். தமிழகத்தில் 9, 10ம் வகுப்பு மற்றும் பிளஸ் 1, பிளஸ் 2 வகுப்பு மாணவர்களுக்கு பள்ளிகள் திறக்கப்பட்டு வகுப்புகள் நடந்து வருகிறது. வேலூரில் உள்ள அரசு உதவி பெறும் வெங்கடேஸ்வரா மேல்நிலைப்பள்ளியில் பிளஸ் 1, பிளஸ் 2 மாணவர்கள் 540 பேர் படித்து வருகின்றனர். அவர்களில் சிலர் லைன் கட்டிங், டாப் கட்டிங் போன்ற பல்வேறு முறைகளில் சரியான முறையில் தலைமுடியை வெட்டாமல் ஸ்டைலாக வந்துள்ளனர். இதனால் பள்ளி நிர்வாகம் சார்பில் மாணவர்களை அழைத்து தலைமுடியை ஒழுக்கமாக வெட்டி வர வேண்டும் என்று பல நாட்களாக அறிவுறுத்தி வந்தது. இதை மாணவர்கள் கடைப்பிடிக்காமல் போக்கு காட்டி வந்தனர். இதற்கிடையே பள்ளி தலைமை ஆசிரியர் நெப்போலியன், ஒழுங்கற்ற முறையில் நேற்று பள்ளிக்கு வந்த 100 மாணவர்களுக்கு 2 தொழிலாளர்கள் மூலம் பள்ளி வளாகத்திலேயே தலைமுடியை திருத்தம் செய்ய ஏற்பாடு செய்தார். இது குறித்து தலைமை ஆசிரியர் நெப்போலியன் கூறுகையில், ‘‘பள்ளிக்கல்வித்துறை உத்தரவின்படி மாணவர்களுக்கு பெற்றோர் ஒத்துழைப்புடன் தலைமுடி திருத்தம் செய்யப்பட்டது. நல்லொழுக்கம் பெற்று நல்ல மாணவர்களாக திகழவேண்டும் என்ற நோக்கத்தில் இதுபோன்ற பணியை தொடங்கினேன். ஒரு மாணவனுக்கு முடி திருத்தம் செய்ய ரூ.60 கட்டணம் கொடுக்கப்படுகிறது. பிளஸ்1 மற்றும் பிளஸ்2 மாணவர்கள் 100 பேருக்கு முடி திருத்தம் மேற்கொள்ளப்பட்டது. நாளை(இன்று) 9 மற்றும் 10ம் வகுப்பு மாணவர்களுக்கு இதுபோன்று கட்டிங் செய்யப்படும்’’ என்றார்.

  • பெட்ரோல், டீசல், காஸ் விலை உயர்வை கண்டித்து மாவட்டம் முழுவதும் திமுக கூட்டணி ஆர்ப்பாட்டம்
    on September 21, 2021 at 12:57 am

    திருவள்ளூர்: பெட்ரோல், டீசல், காஸ் விலை உயர்வு மற்றும் 3 வேளாண் சட்டங்களை ரத்து செய்யக்கோரி ஒன்றிய பாஜ அரசை கண்டித்து திருவள்ளூர் எம்எல்ஏ வி.ஜி.ராஜேந்திரன், மாவட்ட பொறுப்புக் குழு உறுப்பினர் கே.திராவிடபக்தன், ஆர்டிஇ.ஆதிசேஷன், கிழக்கு ஒன்றிய செயலாளர் கே.அரிகிருஷ்ணன் ஆகியோர் மணவாளநகரில் ஆர்ப்பாட்டத்தில் ஈடுபட்டனர். இதேபோல், பூந்தமல்லி எம்எல்ஏ ஆ.கிருஷ்ணசாமி பட்டாபிராமிலும், திருவள்ளூர் தெற்கு மாவட்ட காங்கிரஸ் தலைவர் லயன் டி.ரமேஷ், திருவேற்காடு நகர திமுக செயலாளர் என்.இ.கே.மூர்த்தி, மாவட்ட இளைஞரணி அமைப்பாளர் பிரபு கஜேந்திரன் ஆகியோர் திருவேற்காட்டிலும், பூந்தமல்லி கிழக்கு ஒன்றிய செயலாளர் எம்.ஜெயக்குமார், நகர செயலாளர் எம்.ரவிக்குமார் ஆகியோர் கரையான்சாவடியிலும், மேற்கு ஒன்றிய செயலாளர் டி.தேசிங்கு கொத்தியம்பக்கத்திலும், பூண்டி கிழக்கு ஒன்றிய செயலாளர் டி.கே.சந்திரசேகர், மேற்கு ஒன்றிய செயலாளர் டி.கிருஷ்டி, ஒன்றிய குழு துணைத்தலைவர் மகாலட்சுமி மோதிலால், வடக்கு ஒன்றிய செயலாளர் ரவி ஆகியோர் தங்களது இல்லங்கள் முன்பும், திருமழிசை பேரூர் செயலாளர் தி.வே.முனுசாமி, மாவட்ட பொறுப்புக் குழு உறுப்பினர் ஜெ.மகாதேவன், திருவள்ளூர் நகர செயலாளர் சி.சு.ரவிச்சந்திரன், கடம்பத்தூர் மேற்கு ஒன்றிய செயலாளர் மோ.ரமேஷ், ஒன்றியக்குழு துணைத் தலைவர் சரஸ்வதி ரமேஷ், திருவள்ளூர் வடக்கு ஒன்றிய செயலாளர் புஜ்ஜி டி.ராமகிருஷ்ணன், தெற்கு ஒன்றிய செயலாளர் ஆர்.ஜெயசீலன், மாவட்ட பொறுக்குழு உறுப்பினர்கள் எஸ்.ஜெயபாலன், பா.நரேஷ்குமார் த.எத்திராஜ், ஒன்றியக்குழு தலைவர் ஜெயசீலி ஜெயபாலன், ஒன்றியக்குழு துணைத் தலைவர் எம்.பர்கத்துல்லா, மாவட்ட வர்த்தக அணி துணை அமைப்பாளர் ஈக்காடு கே.முகமது ரஃபி ஆகியோர் தங்களது இல்லங்களின் முன்பும் கண்டன முழக்கங்களை எழுப்பினர்.திருவள்ளூர் தெற்கு மாவட்ட காங்கிரஸ் முன்னாள் தலைவர் பூவை பீ.ஜேம்ஸ் தலைமையில் மாவட்ட நிர்வாகிகள் எஸ்.இமயவர்மன், ஐ.தாயுமானவன், எம் கோபால், அணில் பைசல், டெல்லி சுரேஷ், ஏசுபாதம், பசுவராஜ், எஸ்.எஸ்.ராஜேந்திரன், ராஜசேகர், குமரேசன், வீரபாண்டியன், கோபி, சிட்டிபாபு, யூனூஸ், சோமு, குமார், தசரதன், டேனியல், ஏசு ஆகியோர் முன்னிலையில் குமணன்சாவடியில் உள்ள காங்கிரஸ் அலுவலகம் எதிரிலும், வயலூர் கிராமத்தில் முன்னாள் ஊராட்சி தலைவர் சீனிவாசன், வழக்கறிஞர் எஸ்.பார்த்தீபன், சீத்தாபதி, சாந்தி, தயாளன், முருகன், ரவி, ஆறுமுகம், வெங்கடேசன், ரமேஷ், பெருமாள், நாராயணன் ஆகியோரும் கண்டன முழக்கங்களை எழுப்பினர்.ஊத்துக்கோட்டை: எல்லாபுரம் வடக்கு ஒன்றியம் சார்பில் பெட்ரோல், டீசல், காஸ் விலை உயர்வு மற்றும் 3 வேளாண் சட்டங்களை ரத்து செய்வது குறித்து ஒன்றிய அரசை கண்டித்து திமுக மற்றும் கூட்டணி கட்சிகள் சார்பில் கண்டன ஆர்ப்பாட்டம் நடைபெற்றது. இதில் எல்லாபுரம் வடக்கு ஒன்றிய செயலாளர் பி.ஜெ.மூர்த்தி தலைமை தாங்கினார். அவைத்தலைவர் ரவிச்சந்திரன், மாவட்ட வழக்கறிஞர் அணி துணை அமைப்பாளர் சீனிவாசன், மாவட்ட இளைஞரணி துணை அமைப்பாளர் கே.வி.லோகேஷ்,   முகமது மொய்தீன், சங்கர், ஏழுமலை, சம்பத், முனுசாமி, தமிழரசு உட்பட பலர் கலந்துகொண்டனர். திருத்தணி: ஒன்றிய அரசின் வேளாண் சட்டம் மற்றும் பெட்ரோல், டீசல், காஸ் விலை உயர்வை கண்டித்து திருவள்ளூர் மேற்கு மாவட்ட திமுக சார்பில், திருத்தணியில் உள்ள திமுக அலுவலகம் முன்பு கருப்புக்கொடி ஏந்தி ஆர்ப்பாட்டம் நடைபெற்றது. இதில் திருவள்ளூர் மேற்கு மாவட்ட பொறுப்பாளர் திருத்தணி எம்.பூபதி தலைமை வகித்தார். எஸ்.சந்திரன் எம்எல்ஏ முன்னிலை வகித்தார். மாவட்ட பொறுப்பாளர் மு.நாகன், வக்கீல் கிஷோர்ரெட்டி, நகர துணை செயலாளர் கணேசன், நகரபொறுப்பாளர்கள், பள்ளிப்பட்டு வடக்கு ஒன்றிய பொறுப்பாளர் வக்கீல் சீனிவாசன், ஜிஎஸ்.கணேசன், முன்னாள் கவுன்சிலர் ஜின்னா உள்பட பலர் கலந்துகொண்டனர். இதேபோல், திருத்தணி ஒன்றியத்துக்கு உட்பட்ட அகூர் கிராமத்தில் ஒன்றியக்குழு முன்னாள் தலைவர் அகூர் மாணிக்கம் தலைமையில் திமுகவினர் ஒன்றிய அரசை கண்டித்து ஆர்ப்பாட்டத்தில் ஈடுபட்டனர். கும்மிடிப்பூண்டி: திருவள்ளூர் கிழக்கு மாவட்ட திமுக சார்பில் கும்மிடிப்பூண்டி அடுத்த கொள்ளூர் கிராமத்தில் திருவள்ளூர் கிழக்கு மாவட்ட திமுக பொறுப்பாளரும், கும்மிடிப்பூண்டி எம்எல்ஏவுமான டி.ஜெ.கோவிந்தராஜன் தலைமையில் கருப்புக்கொடி ஆர்ப்பாட்டம் நடைபெற்றது. இதில் திமுக மாணவரணி மாவட்ட அமைப்பாளர் வெற்றி, மாதர்பாக்கம் ஊராட்சி தலைவர் சீனிவாசன், தயாளன் உள்ளிட்ட திமுகவினர் பங்கேற்று ஒன்றிய அரசை கண்டித்து கண்டன கோஷம் எழுப்பினர். இதேபோல், கும்மிடிப்பூண்டி அடுத்த பன்பாக்கத்தில் திமுக உயர்நிலை செயல்திட்ட குழு உறுப்பினரும், முன்னாள் எம்எல்ஏவுமான கும்மிடிப்பூண்டி கி.வேணு தலைமையில் ஒன்றிய அரசை கண்டித்து கருப்பு கொடி ஆர்ப்பாட்டம் நடைபெற்றது. பொன்னேரி: மீஞ்சூர் ஒன்றியத்துக்கு உட்பட்ட வல்லூர் திமுக கிளை அலுவலகம் முன்பு ஒன்றிய செயலாளர் வல்லூர் ரமேஷ் ராஜ், மீஞ்சூர் நகர செயலாளர் மோகன்ராஜ் ஆகியோர் தலைமையில் ஒன்றிய அரசை கண்டித்து கருப்புக்கொடி ஆர்ப்பாட்டம் நடைபெற்றது. இதில் நிர்வாகிகள் தன்சிங், தமிழரசன், முனுசாமி, ரவிச்சந்திரன் ஆகியோர் பங்கேற்றனர். இதேபோல் அத்திப்பட்டு ரயில் நிலையம் அருகே ஒன்றியக்குழு தலைவர் ரவி தலைமையில் திமுக நிர்வாகிகள் முன்னிலையில் கருப்புக்கொடி ஆர்ப்பாட்டம் நடைபெற்றது.

  • ஆர்.கே.பேட்டை மலைப்பகுதியில் வெடி பொருட்கள் செயலிழப்பு
    on September 21, 2021 at 12:57 am

    பள்ளிப்பட்டு: கும்மிடிப்பூண்டி பகுதியில் கைப்பற்றப்பட்ட சக்திவாய்ந்த வெடிபொருட்கள் மற்றும் வெடிகுண்டுகளை ஆர்.கே.பேட்டை ஒன்றியம் கதனநகரம் மலைப்பகுதியில் வைத்து செயலிழப்பு செய்ய மாவட்ட போலீசார் முடிவு செய்தனர். இதற்காக அங்குள்ள கல்குவாரி தேர்வு செய்தனர். ராணுவம் மற்றும் வெடிகுண்டு செயலிழப்பு நிபுணர்கள் அடங்கிய குழுவினர் நேற்று முதல் 5 நாட்களுக்கு வெடி பொருட்களை செயலிழப்பு செய்யும் பணியில் ஈடுபட்டு வருகின்றனர். இதற்காக ஏராளமான போலீசார் பாதுகாப்பு பணியில் ஈடுபடுத்தப்பட்டுள்ளனர். அவர்களுக்கு உதவியாக வருவாய் துறையினரும் ஈடுபட்டுள்ளனர். வெடிகுண்டுகளை செயலிழக்கச் செய்யும் பணி நடைபெற்று வருவதால், மலைப்பகுதிக்கு அருகில் உள்ள கிராம மக்கள் அடுத்த 5 நாட்களுக்கு வீடுகளை விட்டு வெளியில் வர வேண்டாம் என்றும், விவசாய நிலங்களுக்கு செல்ல சென்று விவசாய பணிகளில் ஈடுபட வேண்டாம் என்றும் மேலும், கால்நடைகளை வளர்ப்போர் மேய்ச்சலுக்கு செல்ல வேண்டாம் எனவும் பொதுமக்களுக்கு தண்டோரா மூலம் தெரிவிக்கப்பட்டுள்ளது.

  • புரட்டாசி பவுர்ணமியை முன்னிட்டு திருவேற்காடு கருமாரி அம்மன் கோயிலில் நிறைமணி காட்சி: 3 நாட்கள் நடக்கிறது
    on September 21, 2021 at 12:46 am

    பூந்தமல்லி: ஆண்டுதோறும் புரட்டாசி மாதம் பவுர்ணமி தினத்தில் திருவேற்காடு தேவி கருமாரி அம்மன் கோயிலில் நிறைமணி காட்சி நடைபெறும். இந்த ஆண்டும் கோயில் கருவறை மற்றும் முன்பகுதியில் பழங்கள், காய்கறிகள், தானியங்கள், எண்ணெய், மூலிகை தாவரங்கள், இனிப்பு வகைகள் உள்ளிட்ட பல்வேறு பொருட்கள் கட்டி பந்தல் முழுவதும் தொங்க விடப்பட்டிருந்தது. இந்த தோரணம் பார்ப்பதற்கு அழகாகவும், கண்ணுக்கு குளிர்ச்சி அளிப்பதுபோலவும் காட்சியளித்தது. மக்களின் வேண்டுதல்கள் நிறைவேறவும், உலகில் மழைபெய்து செழிக்கவும், ஜீவராசிகள் அனைத்தும் பசி, பட்டினி, பஞ்சம் இல்லாமல் வாழ வேண்டும். இயற்கை வளங்கள் பெருக வேண்டும். விவசாயம் தழைக்க வேண்டும் என்பதற்காக இந்த நிறைமணி காட்சி அமைக்கப்படுகிறது. சுமார் 5 டன் அளவுள்ள காய்கறி, பழங்கள் உள்ளிட்ட பொருட்கள் இதில் பயன்படுத்தப்பட்டுள்ளன. மேலும் 3 நாட்கள் நடக்கும் இந்த நிகழ்ச்சியில் கடைசி நாளில் இங்கு தொங்கவிடப்பட்டுள்ள பொருட்களை ஒன்று சேர்த்து கூட்டாஞ்சோறு செய்து அம்மனுக்கு படைக்கப்பட்டு பின்னர் பக்தர்களுக்கு அன்னதானமாக வழங்கப்படும். முன்னதாக மூலவர் அம்மனுக்கு சிறப்பு அபிஷேகமும், அலங்காரமும் செய்யப்பட்டு பூஜைகள், ஆராதனைகளும் நடைபெற்றது. கொரோனா வழிகாட்டு நெறிமுறைகளுடன் பக்தர்கள் தரிசனம் செய்ய அனுமதிக்கப்பட்டனர். நிறைமணி தரிசன காட்சி விழாவில் கோயில் இணை ஆணையர் லட்சுமணன் தலைமை வகித்தார். முன்னாள் அறங்காவலர் லயன் டி.ரமேஷ் திறந்து வைத்தார். இந்நிகழ்ச்சியில், ஏ.கே.எஸ்.சரவணன், ஏ.கே.எஸ்.குமார், டி.ஜெயக்குமார், ஆனந்தசுவாமிகள், புஷ்பலிங்கம், கோவி.அருணகிரி, ஏ.ஜி.எஸ்.சுரேஷ், பொன்ராஜ், பாபுசேகர், கயிலாசம், மாரிமுத்து, கோயில் பேஷ்கர்கள் அண்ணாமலை, மலைச்சாமி, சுப்பிரமணி, சுந்தரி, கோயில் தலைமை குருக்கள் மணிகண்டன், ஸ்ரீதர், சூரஜ், சரவணன், ஜெயகோபால், தமிழ்செல்வன், புவனேஸ்வரன், ஸ்ரீதர், என்.தாண்டவமூர்த்தி உள்பட பலர் கலந்துகொண்டனர். மேலும் பக்தர்கள் நிறைமணி காட்சியில் தொங்கவிடப்பட்டிருந்த பழங்கள், காய்கறிகளை ஆர்வமுடன் செல்போனில் படம் எடுத்துக்கொண்டனர். 

  • ஆக்கிரமிப்புகள் அகற்றம்
    on September 21, 2021 at 12:44 am

    கும்மிடிப்பூண்டி: பெத்திகுப்பம் காலனி பகுதியில் சாலை ஓர நிலங்கள் ஆக்கிரமிக்கப்பட்டுள்ளதாக வட்டாட்சியர் மற்றும் வட்டார வளர்ச்சி அலுவலரிடம் ஊராட்சி மன்ற தலைவர் ஜீவா செல்வம் அளித்த புகாரின் அடிப்படையில் அப்பகுதி முறையாக அளவீடு செய்யப்பட்டது. தொடர்ந்து நேற்று சாலை ஆக்கிரமிப்புகளை வருவாய் துறையினர் காவல்துறையினரின் உதவியுடன் அரசு நிலத்தில் ஆக்கிரமிப்புகளை அகற்றினர். அப்போது, கிராம நிர்வாக உதவியாளர் திருப்பதியை, அதே பகுதியை சேர்ந்த நாகஜோதி(29) என்பவர் தாக்கியதாக கூறப்படுகிறது. இதனால் போலீசார் அவரை கைது செய்தனர். இதற்கிடையில், ஆக்கிரமிப்புகளை அகற்றுவதை கண்டித்து அதே பகுதியை சேர்ந்த மணியம்மாள்(50) என்பவர் தீக்குளிக்க முயன்றார். இதனால் அப்பகுதியில் சில மணி நேரம் பரபரப்பான சூழல் காணப்பட்டது. இறுதியில் பொக்லைன் இயந்திரம் மூலம் 12 சென்ட் அரசு நிலத்தை மீட்டனர். இதன் மதிப்பு ரூ.10 லட்சம்.

  • காஞ்சிபுரம், செங்கல்பட்டு மாவட்டங்களில் ஒன்றிய அரசை கண்டித்து திமுகவினர் கருப்பு கொடி ஆர்ப்பாட்டம்
    on September 21, 2021 at 12:43 am

    காஞ்சிபுரம்: காஞ்சிபுரம், செங்கல்பட்டு மாவட்டங்கள் முழுவதும் ஒன்றிய பாஜ அரசை கண்டித்து, திமுக மற்றும் கூட்டணி கட்சியினர், தங்களது வீடுகளில் கருப்புக்கொடி ஏந்தி கண்டன ஆர்ப்பாட்டத்தில் ஈடுபட்டனர். காங்கிரஸ் தலைவர் சோனியாகாந்தி தலைமையில் நடந்த கூட்டத்தில் திமுக தலைவர் ஸ்டாலின் உள்பட பல்வேறு கட்சித் தலைவர்கள் காணொளி மூலம் கலந்து கொண்டனர். அப்போது, ஒன்றிய பாஜ அரசு 3 வேளாண் சட்டங்களை ரத்து செய்ய மறுப்பது, பெட்ரோல், டீசல் விலையை தொடர்ந்து உயர்த்தி வருவது, பொருளாதார சீரழிவை ஏற்படுத்துவது, தனியார் மயமாக்கல், வேலையில்லா திண்டாட்டம் உள்பட மக்கள் விரோத நடவடிக்கைகளை கண்டித்து நாடு முழுவதும் செப்டம்வர் 20 முதல் 30ம் தேதிவரை பல்வேறு போராட்டங்கள் நடத்த முடிவு செய்யப்பட்டது. இதைதொடர்ந்து, காஞ்சிபுரம் தெற்கு மாவட்டம் முழுவதும் திமுக கூட்டணி கட்சிகள் சார்பில் அவரவர் வீடுகளின் முன்பு கருப்புக்கொடி ஆர்ப்பாட்டம் நேற்று நடந்தது. காஞ்சி தெற்கு மாவட்ட செயலாளர் க.சுந்தர் எம்எல்ஏ தலைமையில் சாலவாக்கத்தில் உள்ள அவரது வீட்டின் முன்பு கருப்பு கொடி ஏந்தி, ஒன்றிய பாஜ அரசுக்கு எதிராக திமுகவினர் கோஷமிட்டனர். இதில், ஒன்றிய செயலாளர் சாலவாக்கம் குமார், ஊராட்சி செயலாளர் வெங்கடேசன் உள்பட பலர் கலந்துகொண்டனர். அதேபோல் காஞ்சிபுரம் அடுத்த சிறுவேடலில் எம்பி செல்வம், தனது  வீட்டின் முன்பு கருப்பு கொடி ஏந்தி கண்டன ஆர்ப்பாட்டத்தில் ஈடுபட்டார். காஞ்சிபுரம் ரயில்வே சாலையில் எம்எல்ஏ வக்கீல் எழிலரசன், நரசிங்கராயர் தெருவில் உள்ள நகர செயலாளர் சன்பிராண்ட் ஆறுமுகம் ஆகியோர் தங்களது வீட்டின் முன்பு ஆர்ப்பாட்டம் நடத்தினர்.செங்கல்பட்டு: செங்கல்பட்டு மாவட்டத்தில், ஒன்றிய பாஜ அரசு 3 வேளாண் சட்டங்களை ரத்து செய்ய மறுப்பது, பெட்ரோல், டீசல் விலையை தொடர்ந்து உயர்த்தி வருவது, பொருளாதார சீரழிவை ஏற்படுத்துவது, தனியார் மயமாக்கல், வேலையில்லா திண்டாட்டம் உள்பட மக்கள் விரோத நடவடிக்கைகளை கண்டித்து கருப்பு கொடியேந்தி கண்டன ஆர்ப்பாட்டம் நேற்று நடந்தது. இதையொட்டி, மறைமலைநகரில் வரலட்சுமி மதுசூதனன் எல்எல்ஏ, தனது வீட்டின் முன்பு கருப்பு கொடி ஏந்தி ஆர்ப்பாட்டம் நடத்தினார். செங்கல்பட்டு நகர செயலாளர் நரேந்திரன், பொதுக்குழு உறுப்பினர் அன்புசெல்வன் தலைமையில் செங்கல்பட்டு நகராட்சியில் உள்ள 33 வார்டுகளில், திமுகவினர் தங்களது வீட்டின் முன்பு கருப்பு கொடியேந்தி கண்டன ஆர்ப்பாட்டம் நடத்தினர். மறைமலைநகர் நகர செயலாளர் சண்முகம் தலைமையில் 21 வார்டுகளிலும், காட்டாங்கொளத்தூர் ஒன்றிய செயலாளர்கள் எம்.கே.தண்டபாணி, ஆராமுதன் தலைமையில் 39 ஊராட்சிகளிலும் கருப்பு கொடி ஏந்தி ஆர்ப்பாட்டம் நடந்தது.திருப்போரூர்: திருப்போரூர் வடக்கு ஒன்றிய செயலாளர் இதயவர்மன் தலைமையில் செங்காடு கிராமத்தில் அவரது வீட்டின் முன்பு கண்டன ஆர்ப்பாட்டம் நடந்தது. மாவட்ட துணை செயலாளர் அன்புச்செழியன், ஒன்றிய பொறுப்புக்குழு உறுப்பினர் கருணாகரன், ஒன்றிய தகவல் தொழில்நுட்ப அணி செயலாளர் ஜெகன் உள்பட பலர் கலந்து கொண்டனர். பையனூரில் தெற்கு ஒன்றிய செயலாளர் பையனூர் சேகர் தலைமையிலும், திருப்போரூர் நகர திமுக சார்பில் காலவாக்கத்தில் உள்ள வீட்டின் முன்பு நகர செயலாளர் தேவராஜ் தலைமையிலும் ஆர்ப்பாட்டம் நடந்தது. ஒன்றியத்தில் உள்ள 50 ஊராட்சிகளிலும் ஊராட்சி கிளை செயலாளர்கள் தலைமையிலும், திருப்போரூர் பேரூராட்சிக்கு உட்பட்ட 15 வார்டுகளில் வார்டு செயலாளர்கள் தலைமையிலும் கண்டன ஆர்ப்பாட்டம் நடந்தது.வாலாஜாபாத்: வாலாஜாபாத் பேரூர் திமுக சார்பில் பேரூர் செயலாளர் பாண்டியன் தலைமையில், திமுக நிர்வாகிகளின் வீடுகள் முன்பு ஆர்ப்பாட்டம் நடந்தது. அவைத்தலைவர் தியாகராஜன், பேரூர் துணை செயலாளர்கள் கீதா லட்சுமி, அகிலன், பழனி, செம்பியன், பேரூர் பொருளாளர் வாசன், திமுக நிர்வாகிகள் பரமானந்தம், அரிகிருஷ்ணன், அகிலன், சச்சிதாஸ், ஆச்சிபாபு, சுரேஷ்குமார், சுகுமார் உள்பட பலர் கலந்து கொண்டனர். இதேபோல் வாலாஜாபாத் ஒன்றிய திமுக சார்பில் அனைத்து நிர்வாகிகள் இல்லங்களின் முன்பு தெற்கு ஒன்றிய செயலாளர் சேகர் தலைமையிலும், வாலாஜாபாத் வடக்கு ஒன்றிய திமுக சார்பில் பூபாலன் தலைமையிலும் ஒன்றிய நிர்வாகிகள் இல்லங்கள் முன்பு கருப்புக்கொடி ஏந்தி ஆர்ப்பாட்டத்தில் ஈடுபட்டனர்.

  • காங்கிரசில் இருந்து 12 மணிக்கு விலகியவர் மாவட்ட கவுன்சிலர் வேட்பாளராக ஒரு மணிநேரத்தில் அறிவிப்பு: அதிமுகவினர் இடையே சலசலப்பு
    on September 21, 2021 at 12:42 am

    திருப்போரூர்: திருப்போரூர் தெற்கு வட்டார காங்கிரஸ் கமிட்டி தலைவராக இருந்தவர் அஜய் மோகன் குமார் (40). கடந்த சில ஆண்டுகளுக்கு முன் விடுதலை சிறுத்தைகள் கட்சி ஒன்றிய பொறுப்பாளராக இருந்தார். அவரது திருமணத்துக்கு அக்கட்சியின் தலைவர் திருமாவளவன் வராததால், கோபமடைந்த அவர், காங்கிரஸ் கட்சியில் இணைந்தார். இதையடுத்து காங்கிரஸ் கட்சியில் அவருக்கு, சமீபத்தில் திருப்போரூர் தெற்கு வட்டார தலைவராக பதவி வழங்கப்பட்டது. இதைதொடர்ந்து ராகுல் காந்தி பிறந்தநாள் விழா, சிதம்பரம் பிறந்தநாள் விழா ஆகியவற்றை நடத்தினார். இந்நிலையில் நடைபெற உள்ள உள்ளாட்சி தேர்தலில் மாவட்டக் கவுன்சிலர் பதவிக்கு போட்டியிட கட்சியில் மனு அளித்தார். ஆனால், மாவட்டக் கவுன்சிலர் பதவி காங்கிரஸ் கட்சிக்கு ஒதுக்கவில்லை என நேற்று முன்தினம் (19ம் தேதி) தெரிவிக்கப்பட்டது. இதனால் அஜய் மோகன்குமார், நேற்று காலை திருப்போரூர் ஒன்றிய அலுவலகத்தில் சுயேச்சையாக வேட்புமனு தாக்கல் செய்ய வந்தார்.அந்த நேரத்தில் அதிமுக ஒன்றிய செயலாளர் குமரவேல், அங்கு வந்திருந்தார். திடீரென அவரது முன்னிலையில் அஜய்மோகன் குமார் அதிமுகவில் இணைந்தார். அவர் இணைந்த ஒரு மணிநேரத்தில், மதியம் 1 மணியளவில், மாவட்ட கவுன்சிலர் பதவிக்கு வேட்பாளராக அஜய்மோகன் குமார் அறிவிக்கப்பட்டார். அதிமுகவில் பல முக்கிய சீனியர்கள் இருக்கும்போது, 11 மணி வரை காங்கிரசில் இருந்து விட்டு 12 மணிக்கு திடீரென அதிமுகவில் சேர்ந்தவருக்கு மாவட்ட கவுன்சிலர் பதவி வேட்பாளராக அறிவித்தது ஏன் என அதிமுகவினர் கேள்வி எழுப்பியுள்ளனர். அ.தி.மு.க.வில் மாவட்டக் கவுன்சிலராக போட்டியிட ஆளே இல்லையா என அவர்கள் வேதனை தெரிவித்துள்ளனர். இதனால் திருப்போரூர் ஒன்றிய அதிமுகவில் சலசலப்பு ஏற்பட்டுள்ளது.

  • சூடு பிடிக்கும் தேர்தல் களம் திருப்போரூர் ஒன்றிய அலுவலகத்தில் திரண்ட உள்ளாட்சி வேட்பாளர்கள்: போலீஸ் தடியடி
    on September 21, 2021 at 12:41 am

    திருப்போரூர்: திருப்போரூர் ஒன்றியத்தில் 50 ஊராட்சி மன்ற தலைவர், 22 ஒன்றிய கவுன்சிலர்கள், 2 மாவட்ட கவுன்சிலர்கள் பதவிக்கான தேர்தல் வரும் அக்டோபர் 6ம் தேதி நடைபெற உள்ளது. இதற்கான வேட்புமனுக்கள் விநியோகம் மற்றும் தாக்கல் ஆகியவை கடந்த 15ம் தேதி தொடங்கியது. தொடர்ந்து, 5ம் நாளான நேற்று ஏராளமானோர் வேட்புமனு பெறவும், தாக்கல் செய்யவும் வேட்பாளர்களும், அவர்களுடன் வந்தவர்களால் திரண்டு வந்ததால் திருப்போரூர் ஒன்றிய அலுவலகம் முழுவதும் திணறியது.  நேற்று ஒரே நாளில் திமுக, அதிமுக, பாமக, விசிக, மக்கள் நீதி மையம், தேமுதிக. அமமுக, பாஜ வேட்பாளர்கள் மனுதாக்கல் செய்ய வந்தனர். இதையொட்டி, ஓஎம்ஆர் சாலையில் கடும் போக்குவரத்து நெரிசல் ஏற்பட்டது. இதையடுத்து போலீசார் திருப்போரூர் ரவுண்டானா அருகே வேன், கார் ஆகிய வாகனங்களை தடுத்து நிறுத்தி, அதில் வந்தவர்களை நடந்து செல்ல அனுமதித்தனர். இதையடுத்து ஒன்றிய அலுவலக நுழைவாயிலில் வேட்பாளர் மற்றும் முன்மொழிபவர் மட்டுமே உள்ளே சென்று மனு தாக்கல் செய்ய முடியும் என கட்டுப்பாடுகளை விதித்து மைக்கில் அறிவித்தபடி இருந்தனர். ஒரே நாளில் ஏராளமானோர் வந்ததால் ஓஎம்ஆர் சாலை, செங்கல்பட்டு சாலை, மாமல்லபுரம் சாலை ஆகிய பகுதிகளில் வாகனங்கள் சுமார் 2 கிமீ தூரத்துக்கு வரிசை கட்டி நின்றன. ஒரு கட்டத்தில் ஊராட்சி ஒன்றிய அலுவலகம் முன்பு தாரை தப்பட்டை அடித்து, பட்டாசு வெடித்து கூட்டமாகவும், ஊர்வலமாகவும் சென்றவர்களை போலீசார் லேசான தடியடி நடத்தி கலைந்து போக செய்தனர். மாமல்லபுரம் டிஎஸ்பி ஜெகதீஸ்வரன், திருப்போரூர் இன்ஸ்பெக்டர் கண்ணையன் தலைமையில் 30க்கும் மேற்பட்ட போலீசார் பாதுகாப்பு பணியில் ஈடுபட்டு, போக்குவரத்தை ஒழுங்குபடுத்தினர். இந்நிலையில், திருப்போரூர் ஒன்றிய அளவில் தண்டலம் ஊராட்சி தலைவர் பதவிக்கு திமுக சார்பில் ரவிக்குமார், கேளம்பாக்கம் ஊராட்சி மன்ற தலைவர் பதவிக்கு ராணி எல்லப்பன் ஆகியோர் நேற்று வேட்புமனு தாக்கல் செய்தனர்.

  • தி.மலையில் பவுர்ணமி கிரிவலம் ரத்து: அண்ணாமலையார் கோயிலில் பக்தர்கள் தரிசனத்திற்கு தடை
    on September 20, 2021 at 8:41 pm

    திருவண்ணாமலை: திருவண்ணாமலை அண்ணாமலையார் கோயிலில் பவுர்ணமியொட்டி இன்று பக்தர்கள் சுவாமி தரிசனம் செய்ய தடை விதிக்கப்பட்டுள்ளது. திருவண்ணாமலையில் மாதந்தோறும் பவுர்ணமி நாளில் லட்சக்கணக்கான பக்தர்கள் கிரிவலம் சென்று வழிபடுவது வழக்கம். ஆனால், உலகை அச்சுறுத்தும் கொரோனா தொற்று பரவல் காரணமாக, கடந்த ஆண்டு மார்ச் முதல் ஊரடங்கு உத்தரவு நடைமுறையில் உள்ளது. அதில், பல்வேறு தளர்வுகளை அரசு படிப்படியாக அறிவித்தபோதும், பவுர்ணமி கிரிவலம் செல்வதற்கான தடை இன்னும் தொடர்கிறது. இந்நிலையில் புரட்டாசி மாத பவுர்ணமி கிரிவலம் செல்ல உகந்த நேரம் வரும் இன்று அதிகாலை 5.20 மணிக்கு தொடங்கி, 21ம் தேதி (நாளை) அதிகாலை 5.51 மணிக்கு நிறைவடைகிறது. ஆனால், தொடர்ந்து 19வது மாதமாக இந்த மாதமும் பவுர்ணமி கிரிவலம் செல்ல தடை விதிக்கப்பட்டுள்ளது. அதேபோல் இன்று அதிகாலை நடை திறக்கப்பட்டு அண்ணாமலையார், உண்ணாமுலையம்மனுக்கு சிறப்பு அபிஷேகம் மற்றும் அலங்காரம் செய்யப்பட்டு தீபாராதனை நடந்தது. பவுர்ணமியொட்டி சிறப்பு பூஜைகள் நடைபெற்றது.  கொரோனா கட்டுப்பாடு காரணமாக வாரந்தோறும் வெள்ளி, சனி, ஞாயிற்றுக்கிழமைகளில் மட்டும் கோயிலில்களில் பக்தர்கள் தரிசனத்திற்கு தடை விதிக்கப்பட்டுள்ளது. ஆனால் பவுர்ணமியான இன்று பக்தர்கள் அதிகளவு வருவார்கள் என்பதால் அண்ணாமலையார் கோயிலில் சுவாமி தரிசனம் செய்ய இன்றும் தடை விதிக்கப்பட்டுள்ளது. மேலும் பக்தர்கள் கிரிவலம் செல்வதை தடுக்கும் வகையில் கிரிவல பாதையில் ஆங்காங்கே போலீசார் தடுப்புகளை அமைத்து பாதுகாப்பு பணியில் ஈடுபட்டுள்ளனர்.

  • கவியருவியில் வெள்ளப்பெருக்கு: சுற்றுலா பயணிகளுக்கு தடை
    on September 20, 2021 at 8:16 pm

    ஆனைமலை: வெள்ளப்பெருக்கு காரணமாக பொள்ளாச்சி அருகேயுள்ள கவியருவியில் குளிக்க சுற்றுலா பயணிகளுக்கு இன்று தடை விதிக்கப்பட்டது. பொள்ளாச்சியை அடுத்த மேற்கு தொடர்ச்சி மலைகளின் அடிவாரத்தில் அமைந்துள்ள ஆழியார் குரங்கு அருவிக்கு அண்மையில் வனத்துறை சார்பில் கவியருவி என பெயர் மாற்றம் செய்யப்பட்டது. இந்நிலையில், ஊரடங்கு தளர்வு காரணமாக வனத்துறை கட்டுப்பாட்டில் உள்ள கவியருவி திறக்கப்பட்டு சுற்றுலா பயணிகள் அனுமதிக்கப்பட்டு வந்தனர்.நேற்று வழக்கம்போல் அருவி திறக்கப்பட்டு சுற்றுலா பயணிகள் குளித்து வந்த நிலையில், கவிஅருவியின் நீர்ப்பிடிப்பு பகுதிகளான சக்திஎஸ்டேட், கவர்கல் உள்ளிட்ட பகுதிகளில் பெய்த கனமழையால் அருவிக்கு தண்ணீர் வரத்து அதிகரித்தது. நேற்று மாலை அருவியில் வெள்ளப்பெருக்கு ஏற்பட்டதால், அங்கு குளித்துக்கொண்டிருந்த சுற்றுலா பயணிகளை வனத்துறை அதிகாரிகள் உடனடியாக அங்கிருந்து வெளியேற்றினர். வெள்ளத்தில் பாறைகள், மரக்கிளைகள் அடித்து வரப்படும் அபாயம் உள்ளதால், பாதுகாப்பு கருதி அருவி நேற்று மூடப்பட்டது. இன்று காலை 7 மணிக்கு அருவிக்கு செல்ல சுற்றுலா பயணிகள் அனுமதிக்கப்பட்டாலும், அருவியில் வெள்ளம் குறையாததால் குளிக்க தடை விதிக்கப்பட்டது. இதனால் அருவிக்கு வந்த சுற்றுலா பயணிகள் ஏமாற்றம் அடைந்தனர்.

தினகரன் தமிழக செய்திகள் live | தினகரன் தமிழக செய்திகள் dinamalar | தினகரன் தமிழக செய்திகள் | தினகரன் தமிழக செய்திகள் pdf | தினகரன் தமிழக செய்திகள் today

admin
Author: admin

https://www.erodedistrict.com

Leave a Comment

Your email address will not be published. Required fields are marked *

*
*